Kua puta te kōrero a te tumuaki o Te Pūtahi Pāho kei te tautoko rātou i ngā whakaaro o ngā kaihautū o Whakaata Māori e mea nei ka tahuri taua whakahaere ki te whakarewa i tētahi teihana tuarua ā te tau 2008.

Ko te mahi a te Pūtahi Pāho he pōti i ngā mema o te poari o Whakaata Māori, he āta tirotiro hoki ki āna kaupapa me āna tikanga whakahaere.

I puta ngā whakamārama a te Tumuaki a Tūwhakairiora Williams he mea nui te teihana tuarua, hei tikanga whakapāoho i ngā kai e ngata ai ngā hiahia o te hunga tino matatau ki te kōrero i te reo, o te hunga hoki e ako nei i te reo.

E ai ki a Tū, “ko te tino kaupapa o Whakaata Māori he whakatairanga i te reo Māori me ngā tikanga i roto i te reo Māori me te reo Pākehā, me te mōhio anō mai i te tīmatanga ko tētahi o ngā hiahia kia hāngai ēnei pāhotanga ki ngā hiahia o tētahi rāngai mātakitaki whānui tonu. Kātahi anō ka tino wātea mai he rerenga kōrero i roto i te reo Māori motuhake i ngā hāora nui te mātaki mai.”

E tautoko ana te Pūtahi Pāho i te kī a Hēmi Mather e kore tōna whakarewanga e whakaputa kē i te whakatāhuhu i ngā hōtaka, i te āhua rānei o ngā mahi whakahaere, i te nui o te reo Māori e rangona ana i te pouaka o tēnei wā, e ai ki a Tū.

“Kei te koa te Pūtahi Pāho i te rongo ka wātea he wāhanga ki ngā kārangatanga iwi Māori ki te tuku mai i ā rātou hōtaka motuhake mō rātou.” E ai ki a Tū hei whakawātea tēnei i ētahi hāora pāho mō ngā reo ā-rohe kia pānuitia ki te ao, kia whakaahuatia mai hoki ngā mahi o te wā me ngā kaupapa whakapakari a ngā iwi o te motu. Ki a ia e koa ana a Te Pūtahi Pāho ka piki ki te 90 ōrau te whakatāhuhutanga hōtaka he hōtaka nō Aotearoa me te rongo anō e 30 ki te 45 ōrau o te whakatāhuhutanga hōtaka he hōtaka hou.   

Ko te hiahia ka kaha tonu te Kāwanatanga ki te whāngai i te Pouaka Whakaata nei ki ngā herengi e tika ana, ā, e tū tonu ana ngā mihi mō te whakapikinga i ngā pūtea ki te teihana i te kaute ā-motu o tēnei tau.”

[Kei roto i te Pūtahi Pāho:

Te Rōpū Whakakotahi

Te Kaunihera Māori

Te Ātārangi

Te Rōpū Wāhine Māori Toko i Te Ora

Te Whakaruruhau o Ngā Reo Irirangi

Te Ātārangi

Te Tauihu o Ngā Wānanga

Ngā Aho Whakaari

Kawea Te Rongo

Te Rūnanganui o Ngā Kura Kaupapa o Aotearoa

Te Kōhanga Reo

me ngā Kaiwhakapūmau i Te Reo.